Yurtimizda har yili azaliy qadriyat – Navro‘z katta tantanalar bilan qarshi olinadi. Navro‘z – mehr-muruvvatga, insonparvarlikka yo‘g‘rilgan, odamlarni ruhan birlashtiradigan bayram. U azaldan xalqimizning turmush tarzi, orzu-o‘ylarini, go‘zallik va nafosatga munosabatini ifodalagan.
Har yili Navro‘z bayrami arafasida mamlakatimizda umumxalq hashari o‘tkazish an’anaga aylangan. Bu yil institutimizda o‘tkazilgan hashar ham o‘zgacha tus oldi. Bayram oldidan har bir hudud, binolar, auditoriyalarda murabbiylar boshchiligida talaba-yoshlar tomonidan keng ko‘lamli obodonlashtirish ishlari amalga oshirildi. Shuningdek, institut hovlilari orastalanib, atrof-muhit, ariq-zovurlar, “Kamolot” bog‘i tozalandi va tartibga keltirildi. Ayniqsa, Talabalar shaharchasi yangi tushgan kelinchakning hovlisidek ko‘rkam tusga aylantirildi. Chunki Navro‘z bayramining asosiy tantanalari Talabalar turar joyida o‘tkazildi.
Dastlab fakultetlar kesimida doshqozonlar osilib sumalak tayyorlandi. Sumalak atrofida yig‘ilgan yoshlarni ko‘rib, ularni shijoati, iqtidori yana bir bor kashf etildi. Ertalabgacha she’r, kuy va qo‘shiq, o‘yin-kulgu avjida tayyorlangan sumalak saylgoh dasturxoniga ko‘rk bag‘ishlab, Talabalar shaharchasida o‘tkazilgan Navro‘z sayliga ulanib ketdi. Fakultetlar tomonidan tayyorlangan ko‘klam taomlari, halim, ko‘k somsa, ko‘k chuchvara kabilar dasturxonga tortildi. Nafaqat umum fakultet, balki alohida guruhlar tomonidan did bilan bezatilgan dasturxonlar e’tiborimizni tortdi. Qolaversa, milliy o‘yinlarimizdan tashkil topgan fakultetlararo sport musobaqalari juda qiziqarli o‘tdi.